Nova: As propostas de FalaRedes chegan esta semana a cinco concellos
![](/sites/default/files/menu_icons_sxcultura/menu_icon_763.png)
11/09/2014
As propostas de FalaRedes chegan esta semana a cinco concellos
O concurso infantil Os Bolechas e o Sabichón atoparase desde mañá coa cativada de Monterroso, Cerdedo e Lousame, tras visitar o luns a de Marín no marco das festas da Virxe do Porto
A veciñanza da vila ourensá de Sarreaus gozará o sábado do espectáculo de fados en galego Os sons do vento que pasa
Santiago de Compostela, 11 de setembro de 2014.- O programa de dinamización lingüística FalaRedes, promovido pola Consellería de Cultura, Educación e Ordenación Universitaria por medio da Secretaría Xeral de Política Lingüística, visitará esta semana as catro provincias galegas, ao levar dúas das súas propostas de lecer a cinco novas vilas.
A primeira será o exitoso concurso infantil Os Bolechas e o Sabichón, que tras o cheo absoluto acadado o pasado luns na vila pontevedresa de Marín, no marco da celebración das festas da Virxe do Porto, mañá fará as delicias dos nenos e nenas do municipio lucense de Monterroso (ás 18:00 h na Casa da Cultura), o sábado dos do pontevedrés de Cerdedo (ás 19:00 no Auditorio do Centro Cultural) e o domingo dos do coruñés de Lousame (ás 19:00 h no salón de actos da Casa da Cultura).
Quen tamén continúa coa súa xira polos concellos da Rede de Dinamización Lingüística (RDL) da Xunta de Galicia no marco do FalaRedes 2014 é Os sons do vento que pasa, o concerto de fados en galego que este sábado deleitará a veciñanza da localidade ourensá de Sarreaus, ás 18:30 h no Centro de Desenvolvemento Rural O Viso.
Lecer de calidade no noso idioma
Con estas dúas propostas o programa busca promover o uso e a valoración positiva da lingua galega, especialmente entre a infancia e a mocidade, enchendo o seu tempo de lecer con actividades de calidade no noso idioma. Coma sempre, o acceso é libre e de balde ata completar a capacidade das salas.
Dirixido aos nenos e nenas de 4 a 8 anos, no concurso os bonecos Braulio e Loli teñen que superar como líderes de senllos equipos unha serie de preguntas e probas moi divertidas, para o que contan coa axuda do público, convertendo a xente miúda en parte activa e protagonista do espectáculo dinamizador.
Pola súa banda, Os sons do vento que pasa achégalle ao público en xeral a música tradicional portuguesa a través do idioma propio de Galicia, nunha coidada actuación na que Gonçalo Guerreiro pon a voz e Dani Pais o acompañamento musical e dixital.
Próximas paradas
Tras as actuacións desta semana, Os Bolechas e o Sabichón seguirán coa súa xira, coa que ata finais de mes aínda farán parada nos concellos de Dodro, Castro Caldelas, O Barco de Valdeorras, Fisterra, Oroso, Bergondo, Sobrado e Mesía.
Tamén da man do FalaRedes 2014, o concerto de fados chegará ata decembro a un total de 36 vilas galegas adscritas á RDL, visitando proximamente Vilaboa e Campo Lameiro. Xa en outubro, será a veciñanza de Curtis, Bóveda, Noia, Lousame, Outes e Oleiros a que poderá deleitarse cos fados de Gonçalo Guerreiro, que en novembro soarán nos concellos de Verín, Foz e Cuntis, antes de despedirse en decembro na localidade coruñesa de Arzúa.
FalaRedes 2014
Ata finais de ano, FalaRedes chegará durante as fins de semana e os festivos á totalidade de concellos da RDL a través de cinco actividades con 150 sesións gratuítas coas que reforzará a súa oferta de ocio na nosa lingua.
Completan a programación desta terceira edición do programa o concerto Toc Toc e a xincana Augalingua, que xa concluíron con grande éxito as súas respectivas xiras, e a obra de teatro infantil As fabas máxicas, que o próximo 19 de setembro tamén volverá a atoparse co público tras o descanso estival.
Toda a información sobre FalaRedes 2014 no web institucional da Secretaría Xeral de Política Lingüística www.xunta.es/linguagalega/falaredes_2014 e nas redes sociais.