Nova: Taghaitaí e Cantigas e Agarimos poranlle música ao Magosto no Gaiás

Santiago, 23 de novembro de 2014.- A Consellería de Cultura, Educación e Ordenación Universitaria convida a todos os galegos a celebrar este venres, 28 de novembro, unha festa cento por cento galega cunha nova edición de Magosto no Gaiás, o ciclo co que a Cidade da Cultura mestura música e gastronomía.

Este Magosto no Gaiás terá como protagonistas aos mestres gaiteiros no que pretende ser unha homenaxe a dúas grandes figuras: Basilio Carril e Xan Bello Mallou. A música virá da man da banda Taghaitaí, que misturará cancións do seu álbum debut con temas compostos por Carril e Mallou, acompañados do coro e cuarteto tradicional de Cantigas e Agarimos, do que ambos os dous formaron parte, e as pandereteiras das Penasqueiras de Luou.

Desde as 20 horas
O Museo Centro Gaiás será o escenario desta gran festa popular que, desde as 20 horas, ofrecerá unha degustación gratuíta de castañas e queixo ofrecida pola Cantina do Gaiás en colaboración coa Indicación Protexida Castaña de Galicia e a Denominación de Orixe Protexida Arzúa-Ulloa.

Xa no interior, a partir das 21 horas, será o momento da música con Taghaitaí, grupo formado por Edelmiro Fernández (o gaiteiro máis laureado de Galicia), Manolo Maseda (exacordeonista e cantante dos Diplomáticos de Montealto), Lola de Ribeira (voz e percusión) e Iván Costa (gaita e zanfona). Grupo que bebe da tradición galega e que pon toda a súa enerxía nas actuacións, fará que o público forme parte activa do espectáculo, cantando e bailando ao son das súas melodías.

Os temas do seu esperado disco debut misturaranse con temas compostos por Basilio Carril e Mallou, no que estarán acompañados polas Penasqueiras de Luou á pandereita e de varios compoñentes da agrupación folclórica Cantigas de Agarimos, a través do seu coro e cuarteto tradicional.

Fundada en Santiago de Compostela no ano 1921, a agrupación folclórica Cantigas e Agarimos dedicouse á recuperación, conservación e transmisión da cultura tradicional galega, traballando activamente na consolidación e identidade cultural de Galicia. A agrupación, peza fundamental da sociedade compostelá durante o século XX, está hoxe foramda por máis de 80 membros distribuídos nas seccións de coro, baile, pandeireta e instrumental.

Magosto no Gaiás conta cunha entrada única a un prezo de 6 euros, que pode mercarse no Punto On da Cidade da Cultura e en www.servinova.com (máis gastos de xestión).

Dous grandes mestres da gaita
O Magosto no Gaiás deste 2014 quere renderlle unha homenaxe a un dos grandes mestres gaiteiros de Galicia no ano do centenario do seu nacemento: Basilio Carril, gaiteiro e artesán de instrumentos desde os anos 20.

Con Basilio Carril naceu o artesán moderno, o gaiteiro e a gaita moderna ou concertante, apta para ingresar no conservatorio. De sona mundial, os seus instrumentos atópanse nas casas de particulares e museo de todo os continentes: Estados Unidos, Arxentina, Australia, Alemaña, Francia, Brasil e, por suposto, de todos os granes grupos galegos de gaitas do momento.

Como intérprete, Basilio Carril tamén foi extraordinario. Formou parte de Cantigas e Agarimos como gaiteiro principal da formación e con ela viaxou por toda Europa e varios países de América Latina. Realizou numerosas gravacións entre 1964 e 1974 e gañou os principais concursos de interpretación da súa época (Ponteareas, Vigo, Ourense, Compostela, Porriño…).

Xan Bello Mallou, pola súa banda, é outro dos referentes fundamentais cando se fala da gaita en Galicia. No cabodano da súa morte, o ‘Magosto no Gaiás’ recorda tamén a figura dun home que destaca pola súa técnica interpretativa, na que sintetiza como ningún outro o estilo dos gaiteiros de Santiago e comarca.

Boa parte das pezas do seu repertorio son hoxe en día clásicos estandarizados entre as novas xeracións de músicos profesionais e é un dos últimos representantes dunha xeración de gaiteiros que viviu a música tradicional como un feito natural, integrado nunha sociedade e que se transmitía seguindo a cadea de transmisión oral.