Nova: As obras no xacemento de Mogor en Marín rematarán antes de fin de ano
26/11/2014
As obras no xacemento de Mogor en Marín rematarán antes de fin de ano
A Xunta de Galicia leva investido preto de 280.000 euros na xestión integral do patrimonio cultural que supoñen os petróglifos durante os últimos cinco anos
-
Petróglifo de Mogor -
O conselleiro de Cultura, Educación e Ordenación Universitaria, Xesús Vázquez Abad, coa alcaldesa de Marín
Santiago, 26 de novembro de 2014.- O conselleiro de Cultura, Educación e Ordenación Universitaria, Xesús Vázquez Abad, comprometeuse coa alcaldesa de Marín, María Ramallo a entregar antes de final de ano as obras que a Xunta de Galicia vén realizando no Centro acollida de visitantes no xacemento arqueolóxico dos Petróglifos de Mogor.
Os traballos correspóndense coa execución do proxecto museográfico e o acondicionamento das pasarelas e completan as actuacións previstas para que, a principios de 2015, o devandito centro museal se poda abrir ao público e difundir o legado que supón estes extraordinarios conxuntos de gravados rupestres.
O investimento realizado pola Consellería, a través da Dirección Xeral do Patrimonio Cultural, durante o último quinquenio nesta sobranceira estación rupestre é de 279.174 euros. As actuacións incluíron, desde as primeiras sondaxes até o proxecto museográfico, todos os procesos necesarios para a xestión, conservación e posta en valor dos Petróglifos.