Nova: Román Rodríguez comparte cos alcaldes da Ribeira Sacra que a candidatura a Patrimonio Mundial “sairá reforzada da actual situación”
![](/sites/default/files/menu_icons_sxcultura/menu_icon_763.png)
04/06/2021
Román Rodríguez comparte cos alcaldes da Ribeira Sacra que a candidatura a Patrimonio Mundial “sairá reforzada da actual situación”
O conselleiro de Cultura, Educación e Universidade reuniuse cos rexedores municipais para seguir traballando no futuro deste territorio
“Aproveitaremos a situación para tomar impulso e seguir dando pasos cara o si definitivo”, destaca o conselleiro, quen subliña que a Ribeira Sacra “é hoxe un territorio máis vivo, coñecido e mellor coidado”
A Xunta presentará a candidatura o martes no Museo do Prado ante os embaixadores dos 21 países do Comité da Unesco
Lembra que a Administración autonómica ten en marcha o Plan Ribeira Sacra e distintas medidas sectoriais e aspira a captar fondos europeos Next Generation
Santiago de Compostela, 5 de xuño de 2021.- O conselleiro de Cultura, Educación e Universidade, Román Rodríguez, reuniuse hoxe nos Peares con alcaldes e representantes dos concellos que forman o territorio da Ribeira Sacra cos que compartiu que a candidatura a Patrimonio Mundial “sairá reforzada” despois do acordo entre a Xunta de Galicia e o Goberno de España de aprazar estratexicamente o último paso da presentación da candidatura ao Comité do Patrimonio Mundial da Unesco.
Neste marco, o titular de Cultura salientou que o Goberno galego aproveitará a actual situación “para tomar impulso e avanzar, con paso aínda máis firme, cara o si definitivo”. “O noso obxectivo é seguir facendo da Ribeira Sacra un territorio máis vivo, mellor coidado e máis recoñecido en todo o mundo”, precisou antes de engadir que é o momento de seguir traballando e facendo as cousas ben como ata agora para lograr a inclusión na Lista de Patrimonio da Humanidade.
“Debemos estar orgullosos do traballo que levamos feito ata o momento”, afirmou Román Rodríguez. “Avanzamos na boa dirección e nos últimos anos logramos o noso maior propósito que é protexer e impulsar a Ribeira Sacra”, apuntou antes de engadir que o Goberno do Estado e Xunta “intensificará sen descanso” o traballo da candidatura, que será presentada o vindeiro martes día 8 no Museo do Prado de Madrid ante os embaixadores dos 21 países que forman o Comité da Unesco.
Compromiso e horizonte intacto
No marco desta reunión, Román Rodríguez expuxo que a decisión de pospoñer a presentación da candidatura “é unha oportunidade para fortalecela e seguir traballando de xeito conxunto entre as administracións, a sociedade e todos os implicados para chegar a valoración final coas máximas garantías”. Neste senso, sostivo que o compromiso da Xunta con este territorio mantense intacto e que o horizonte segue a ser o mesmo: acadar o máximo recoñecemento da Unesco.
Así, en paralelo ao traballo na candidatura, o Goberno galego continuará avanzando nos distintos plans que ten en marcha en materia ambiental e de promoción turística como o Plan Ribeira Sacra, unha ambiciosa folla de ruta dotada con 34 millóns de euros que inclúe 35 accións de diversos departamentos da Xunta de Galicia vencellados coa ordenación do territorio, a conservación do patrimonio e dos valores.
Estas medidas complementaranse co proxecto que a Administración autonómica presentou aos fondos europeos Next Generation para actuar sobre este territorio e impulsar a recuperación de espazos de alto interese patrimonial que estean deteriorados nos vindeiros anos. Trátase dunha medida que, á espera de que se concrete, aspira a captar 40M€ de investimento.