Nova: A Xunta abre mañá o ciclo de conferencias sobre María Casares coa actriz Johanna Silberstein e o arquitecto Felipe Peña

A Coruña, 8 de febreiro de 2021.- A Xunta de Galicia arranca mañá o ciclo de conferencias María Casares. Do exilio ao escenario, coa actriz e codirectora do centro cultural francés a Maison Maria Casarès, Johanna Silberstein, e o arquitecto Felipe Peña, encargado de rehabilitar a casa familiar Casares Quiroga. As intervencións, que serán presentadas polo secretario xeral de Cultura, Anxo M. Lorenzo, terán lugar no Museo de Belas Artes a partir das 19,30 horas con entrada de balde. Trátase da primeira proposta da programación especial que o Goberno galego, en colaboración con distintas entidades nacionais e internacionais, impulsa este ano para conmemorar o centenario da artista.

Johanna Silberstein ofrecerá o relatorio Nacer española e morrer francesa. Os dominios da Vergne na historia de María Casares. Ademais de codirixir a Maison Maria Casarès desde 2017, a actriz desenvolve unha intensa actividade teatral no seo da compañía Veilleur e imparte obradoiros de iniciación e sensibilización arredor do teatro. Condecorada como Cabaleiro das Artes e das Letras, forma parte do colectivo À mots découverts-experimentation des écritures contemporaines, centrado no desenvolvemento de novas dramaturxias.

Pola súa banda, Felipe Peña afondará o seu traballo de rehabilitación da casa familiar Casares Quiroga na Coruña coa intervención Panaderas doce, en alusión ao enderezo no que se sitúa o inmoble, visitable e que funciona como centro cultural para temas de memoria histórica. Profesor honorario da Escola Superior Técnica de Arquitectura da Coruña, tamén colabora en programas internacionais sobre a rehabilitación do patrimonio europeo.

O ciclo prolóngase ata finais de ano cunha ducia de intervencións protagonizadas por personalidades relevantes do mundo das artes e da cultura que coñeceron desde a proximidade o traballo e o legado da artista. Así, a próxima cita será o 16 de marzo con Anne Plantagenet, autora dunha quincena de libros, novelas, contos, relatos, biografías e unha trintena de traducións do español. O seu último libro, L ‘Unique, Maria Casarès, está dedicado á actriz galega e baseado na súa correspondencia amorosa con Albert Camus. Ese día tamén impartirá un relatorio o director teatral Lluís Pascual, un dos fundadores do Teatre Lliure de Barcelona que estivo a cargo da súa dirección durante os anos 1998-2000 e 2011-2018.

Extensa programación todo o ano

A iniciativa enmárcanse na programación do centenario de María Casares promovida pola Xunta, que ofrecerá durante todo o ano actividades tanto en Galicia como fóra, a través de propostas dixitais, editoriais, escénicas e audiovisuais que percorrerán toda a súa pegada histórica desde diferentes plataformas e linguaxes. Xunto ao Goberno galego, a programación conta coa participación de diferentes entidades e institucións de distintos territorios, como a Biblioteca Nacional de España, a Embaixada de España en Francia, o Instituto Cervantes, a Asociación de Actores e Actrices de Galicia, Edicións Xerais, a Corporación Radio e Televisión de Galicia (CRTVG), entre outras.

Entre as propostas para os vindeiros meses destacan tamén un proxecto en colaboración coa Embaixada de España en París e o Instituto Cervantes que incluirá unha mesa redonda, unha lectura escénica de fragmentos da actriz e unha mostra no Instituto de Cervantes de Marceau e Quentin Bauchart (Francia). En Madrid, en colaboración coa Biblioteca Nacional de España, haberá un ciclo de conferencias e charlas sobre a autora. En Galicia está prevista, entre outras, a posta en marcha de producións propias, coproducións e colaboracións con entidades galegas, nacionais e internacionais; un ciclo audiovisual na Filmoteca de Galicia e a edición de publicacións especiais, entre outras actividades.