Nova: Teatro do Atlántico celebra os seus 30 anos coa estrea de O principio de Arquímedes
20/02/2015
Teatro do Atlántico celebra os seus 30 anos coa estrea de O principio de Arquímedes
A compañía galega produciu esta montaxe a través dunha achega de Agadic de 41.759 euros das axudasa
Xúlio Lago dirixe a María Barcala, Toni Salgado, Alberto Rolán e Marcos Viéitez nesta peza orixinal de Josep María Miró i Coromina traducida por Afonso Becerra
Tras a súa estrea no Pazo da Cultura naronés, a obra visitará Santiago, Carballo, A Coruña, Lugo e Ourense
-
Actores do espectáculo -
Actores do espectáculo
Santiago, 20 de febreiro de 2015.- Teatro do Atlántico estrea hoxe no Pazo da Cultura de Narón o espectáculo O Principio de Arquímedes, unha obra do dramaturgo catalán Josep María Miró i Coromina levada a escena baixo a dirección de Xúlio Lago e con María Barcala, Toni Salgado, Alberto Rolán e Marcos Viéitez na interpretación. A produción, coa que a compañía galega cumpre 30 anos de actividade ininterrompida sobre os escenarios, contou para o seu financiamento cunha subvención da Consellería de Cultura, Educación e Ordenación Universitaria.
O Principio de Arquímedes é un dos 26 espectáculos galegos beneficiarios das axudas que a Agadic (Axencia Galega das Industrias Culturais) destinou en 2014 á dinamización escénica en Galicia, polas que se concederon o pasado ano 600.000 euros para a materialización de montaxes de distintos formatos e estilos. A proposta de Teatro do Atlántico recibiu en concreto 41.759 euros para o seu financiamento, dentro da categoría de creacións de mediano formato.
Baixo sospeita
A partir da tradución realizada por Afonso Becerra e con escenografía de Baltasar Patiño, espazo sonoro de Anxo Graña e vestiario de Susa Porto, Xúlio Lago dirixe nesta ocasión unha montaxe teatral arredor dun asunto tan sensible e polémico na sociedade actual como é a sospeita de pederastia.
No fío argumental, os pais duns rapaces que asisten a uns cursos de natación infantil preséntanlle á directora do centro as queixas sobre o que consideran un comportamento inadecuado por parte dun monitor. O adestrador explica que o único que fixo foi calmar un rapaz e axudalo a tranquilizarse, pero os pais non aceptan esta versión dos feitos e o conflito, lonxe de resolverse, medra cada vez máis.
Xira por cinco escenarios
Á estrea de O Principio de Arquímedes en Narón hoxe venres ás 20:30 horas, á que asistirá o director da Agadic, Jacobo Sutil, seguirá unha segunda función o sábado 21 nese mesmo espazo.
A montaxe visitará a continuación os escenarios de Santiago de Compostela (Teatro Principal, 27 e 28 de febreiro), Carballo (Pazo da Cultura, 6 de marzo), A Coruña (Teatro Rosalía Castro, 20 e 21 de marzo), Lugo (Auditorio Gustavo Freire, 26 de mazo) e Ourense (Teatro Principal, 28 de marzo).