O Festival de Músicas Contemplativas regresa á capital de Galicia cun cartel que inclúe 17 concertos en espazos singulares da cidade, aos que se une por vez primeira a Cidade da Cultura. Entre o 27 de marzo e o 5 de abril, o ciclo ofrece un programa diverso e de gran calidade en lugares emblemáticos da cidade compostelá coincidindo coa Semana Santa.
Fiel á súa cita anual co festival e como froito do encontro orquestral para novos intérpretes que o Consorcio para Promoción de Música da Coruña organiza nestas datas, o Festival de Músicas Contemplativas conta nesta ocasión coa participación da Orquestra Nova da Sinfónica de Galicia, un conxunto que é a viva imaxe do futuro da música clásica en Galicia.
A nouba constitúe o corazón da tradición musical da cidade magrebí de Alxer e a expresión máis clásica da música arabo-andalusí. Poucos intérpretes do repertorio andalusí puxeron tanta paixón no exercicio da súa arte como Beihdja Rahal, a primeira muller que gravou os doce modos da música clásica araboandalusí, ata daquela couto vedado dos homes. L' Express cita entre as "100 personalidades que fan mover Alxeria" a Beihdja Rahal, unha sensible artista firmemente comprometida coa educación e a conservación e transmisión da tradición musical arabo-andalusí.
O tenor José Manuel Montero e o arpista Juan Ramón Hernández presentan un programa concibido para trasladar ao espectador unha impresión do que puido ser o mundo poético-musical na vida de santa Teresa de Jesús… Recitados e cantados, co acompañamento de arpas históricas (unha delas copia dunha existente no abulense Convento da Encarnación), poderemos apreciar a linguaxe directa e sinxela dos poemas e romances de santa Teresa… As músicas son de autores coñecidos da época (Alonso Mudarra, Antonio de Cabezón ou Diego Fernández de Huete) e tons empregados na liturxia e en cerimonias civís e rel
Residente en España hai xa dúas décadas, Gani Mirzo é recoñecido polo seu labor de investigación musical na fusión de xéneros e tradicións como a música curda, a música xenericamente oriental, o flamenco e o jazz. Acompañado pola cantante alxeriana Neila Bembey e o guitarrista español Juan José Barreda, Gani Mirzo fálanos coa súa música do sufrimento e a dor causada pola guerra e o exilio...
Precoz intérprete cunha exitosa e frutífera carreira (actuacións en máis de cincuenta países, máis de sesenta discos e nominación aos premios Grammy incluída) de máis de tres décadas consagrados á música do seu país e ao seu instrumento, a frauta de bambú... Shashank Subramanyam achéganos unha tradición musical de 4.000 anos de antigüidade que esencialmente nos transmite paz e devoción...
“A viaxe como pasaxe na vida, buscando e atopando sitios e persoas. O músico como viaxeiro espiritual…”: o espectador, guiado polos seus ouvidos e emocións, é convidado por Tobie Miller a seguila na súa viaxe. Composicións orixinais e improvisacións e adaptacións sobre temas da tradición relixiosa doutras culturas preséntanse ligadas con pezas compostas por Johann Sebastian Bach transcritas para zanfona por unha virtuosa do instrumento como a canadense Tobie Miller.
Duascentas cantatas relixiosas conservamos das nacidas do xenio e da laboriosa mestría de Johann Sebastian Bach... Ao redor de tres centos deste tipo de composición sacra escribiu Bach durante os 27 anos que ocupou en Leipzig o posto de cantor na igrexa de santo Tomás. A compostelá Real Filharmonía de Galicia, co seu director asociado Maximino Zumalave á fronte, e a mezzosoprano ilerdense Marta Infante interpretarán dúas das tres cantatas que Bach escribiu para alto durante o verán de 1726, un período no que sen dúbida contaba cunha virtuosa cantante.
Parece o máis probable que Cristóbal de Morales escribise o seu Réquiem a cinco voces durante a súa estadía en Roma, sendo cantor da Capela Sixtina. Non hai probas concluíntes da súa motivación, e mesmo se especulou coa idea de que o compuxese para o funeral de Isabel de Portugal, esposa de Carlos V.
Cando se entra no tramo final da conmemoración do oitavo centenario da súa peregrinación a Santiago de Compostela, Ars Atlántica rende homenaxe musical a unha das figuras máis emblemáticas e importantes do mundo cristián: san Francisco de Asís. Coñecida a gran paixón do santo pola música, o compostelán Manuel Vilas preparou un programa con himnos ambrosianos e gregorianos, aleluias, cancións espirituais occitanas, danzas francesas e improvisacións sobre temas do repertorio cristián medieval que nos retrotrae a sonoridades perdidas hai 900 anos.
A idea "de Coimbra a Fisterra" xurdiu a propósito desta primeira incursión en terras galegas de Projecto Alba. O programa retrata a viaxe musical que, de certa maneira, tamén é un camiño xeográfico: partindo da canción de Coimbra e pasando por temas asociados a outras cidades do norte de Portugal (Aveiro, Covilhã) e cancións orixinais compostas neste século por Luis Coelho, o trío chega á canción galega transportando a guitarra portuguesa –case sempre asociada ás diversas formas do fado portugués– a outros ambientes... “para lá do Fado”.
