Patrimonio: O PATRIMONIO EN TRES DIMENSIÓNS

Cun só clic, a través da aplicación web de Turgalicia ‘A maxia dos mosteiros’, pódense descubrir dun xeito case que tanxible pezas, figuras, fachadas, coleccións, cadros, retablos e multitude de detalles de 88 mosteiros e conventos de toda Galicia. Unha visita virtual que lle ofrece ao usuario perspectivas únicas, acompañadas por música e son de ambiente do recinto.

A golpe de clic, o mosteiro de Santo Estevo de Rivas de Sil recibe o visitante con cánticos propios de monxes beneditinos que o transportan ata altura das catro naves da igrexa románica e progótica, nunha perspectiva única.

As campás do convento barroco das Capuchinas convidan a entrar pola fachada de portada única. No interior, agarda un cadro de San Francisco atribuído por algúns a Zurbarán.

Pouco máis dun segundo lle supón ao visitante percorrer os centos de quilómetros de distancia coa provincia de Lugo e descubrir o mosteiro de Santa María de Meira. Os sons solemnes do órgano que o acompañan merguñan o visitante na impecable sobriedade que transmite a súa arquitectura.

Ao sur, as viaxes tridimensionais ofrecen percorridos por patrimonios de grande interese como os que garda no seu interior o mosteiro de Santa María de Oia, que permite gozar nun mesmo espazo de arte románica, gótica e barroca.

Aos usuarios e usuarias que naveguen pola aplicación agárdanlles outras 84 viaxes máis, aínda que o máis seguro é que a beleza deste patrimonio anime a máis de un a erguerse da cadeira e a achegarse ao mesmo lugar para descubrilo.

Coleccións virtuais de museos
Coa mesma intencionalidade, museos como o das Peregrinacións e de Santiago, o Arqueolóxico Provincial de Ourense, o de Belas Artes, o Etnolóxico de Ribadavia, o Massó e o do Castro de Viladonga tamén abren as súas portas virtuais para acceder, dun xeito case que palpable, ás súas coleccións.

O 'touriño de bronce', procedente das escavacións realizadas na Colexiata de Iria Flavia, é tan só un petisco sensorial de todo o que lles está a agardar aos visitantes con esta aplicación no novo web dos museos de Galicia.