Nova: López Campos erixe a protección do patrimonio como unha das actuacións prioritarias da Xunta

Santiago de Compostela, 2 de abril de 2025

O conselleiro de Cultura, Lingua e Xuventude, José López Campos, erixiu hoxe a protección do patrimonio como unha das “actuacións prioritarias do Goberno galego”. Fíxoo na súa intervención na inauguración das xornadas Protección do patrimonio histórico e a súa conexión co urbanismo, organizadas polo Consello Xeral do Poder Xudicial, en colaboración coa Xunta de Galicia, no Museo das Peregrinacións e de Santiago.

“Temos claro que o valioso patrimonio co que contamos é un legado a protexer e conservar en xusta débeda cos nosos devanceiros e nun compromiso inquebrantable coas xeracións futuras, porque estes bens son indisociables á nosa identidade cultural”, argumentou o responsable de Cultura do Goberno galego.

Nesta estratexia, considerou necesario “pór sempre no centro” estes valores de “preservación e conservación” á hora de facer fronte a calquera actuación e intervención para un desenvolvemento urbanístico “respectuoso e sustentable”. No entanto, defendeu que este tipo de execucións tamén deben procurar “un equilibro xusto co normal e razoable crecemento orgánico das contornas das que forma parte”.

Nesta liña, López Campos asegurou que as políticas de protección que está levando a cabo a Xunta serven para manter o papel dos bens patrimoniais como “un indiscutible e necesario elemento de cohesión no desenvolvemento territorial”. “Trátase de satisfacer as necesidades da xeración e sociedade presente sen danar o valioso e imprescindible legado das pasadas e sen comprometer a herdanza e capacidades das futuras”, avogou. “E nesta liña é na que nos situamos e traballamos desde o Goberno galego”, aseverou.

Firme compromiso de conservación do legado patrimonial

O titular de Cultura da Xunta aproveitou estas xornadas para remarcar o “firme compromiso” do Executivo autonómico co legado patrimonial,  “garantido a protección para que non se perda a nosa historia en ningún lugar do territorio”. Con este obxectivo, explicou como a salvagarda dos monumentos históricos abrangue desde os grandes templos, ao abeiro do Plan Catedrais con 38 M€, ata outros bens de diferente tamaño espallados por toda Galicia, “para os que mantemos permanente contacto cos concellos e entidades locais para coñecer as súas necesidades neste eido”. Ademais, lembrou as 130 intervencións arquitectónicas sobre 81 bens realizadas o ano pasado cunha contía de case 13 millóns de euros.

O conselleiro salientou que, froito deste compromiso co “noso patrimonio único”, Galicia conta xa con catro declaracións como Patrimonio Mundial como son a cidade histórica de Santiago de Compostela, o Camiño, a muralla de Lugo e a torre de Hércules. “A eles poderíamos sumar no 2026 a Ribeira Sacra, o que poñería aínda máis en valor o noso patrimonio natural e paisaxístico”, concluíu.