Actividade de dinamización con música, teatro e danza. A banda sonora deste contacontos teatral é obra orixinal do compositor coruñés Tito Barbeito.
Sinopse: Vanessa, actriz condutora da actividade, ten un xardín, turelí. No xardín hai un niño, tureló. No niño hai un ovo, turelí. Espera que dese ovo enorme que nos mostra naza un paxariño.
Para nenos e nenas de ata tres anos.
Actividade de narración oral que recolle a tradición oral e escrita galega.
Contos baseados en mulleres que protagonizaron a historia cotiá e marcaron o futuro. Cancións de berce, poesía, contos das avoas, de ilustradas e non tanto. Un pequeno homenaxe a todas as avoas e particularmente a Minia Senín, personaxe de María Victoria Moreno Márquez, a quen se dedica en 2018 o Día das Letras Galegas.
Para todos os públicos, a partir de 5 anos.
Manoele de Felisa, cantautor galego con diferentes traballos publicados, ofrece unha actividade para lles achegar aos cativos e ás cativas o mundo da poesía a través das súas interpretacións musicais, así como algunha sorpresa lúdica para manter a atención.
María Victoria Moreno, Xosé Neira Vilas ou Rosalía de Castro serán algúns dos poetas que o público coñecerá a partir da voz do cantautor.
Para nenos e nenas de entre 3 e 12 anos.
Taller organizado por Matrácala, pensado para que nenos e nenas poidan expresarse musicalmente a través de elementos de percusión. Os instrumentos están realizados con materiais de refugallo, unha aposta pola concienciación mediante a reutilización de residuos.
Actividade pensada para nenos e nenas de 3 a 6 e de 7 a 12 anos.
Carmiña e Xustino, uns bibliotecarios un tanto peculiares, decidiron secuestrar a un par de criaturas para encher a súa biblioteca, coma nos vellos tempos, e fóiselles "un pouco" das mans. Meteron a unha manchea de rapaces e rapazas en diferentes libros e agora non os atopan! Sorte que, como son moi despistados, deixaron anotacións e pistas para poder dar con eles.
Espectáculo para nenos e nenas de entre 6 e 12 anos.
A partires das aventuras de Catuxa, unha nena que se enfronta aos seus medos grazas a uns vellos zapatos vermellos da súa avoa, este conto fai reflexionar sobre a importancia do respecto, de valorarse a un mesmo, da igualdade e da tolerancia, así como da solución pacífica dos conflitos. Pero en realidade non fan falta uns zapatos máxicos para conseguilo, tan só un cambio de actitude
Para nenos e nenas de entre 5 e 10 anos.
No Ano Europeo do Patrimonio Cultural, Galicia ten moito que contar. A súa riqueza patrimonial, chea de lendas e historias, enche un mapa que toda a xente ten que coñecer. O coñecemento é o camiño máis certo para o amor ao noso. Se se esquece o mapa do imaxinario, debuxado no territorio, pérdese a identidade.
Para público infantil e xuvenil, entre 3 e 12 anos.
Os nenos e as nenas - a partir de 5 anos - son invitados a debuler: debuxar o que len. A actividade quere axudar a descubrir o valor das letras galegas. Usa a narración oral e a técnica kamishibai de debuxo.
A maxia está nos libros son números de maxia sorprendentes e variados relacionados sempre co mundo da lectura. Nesta sesión de entretemento trátase de interactuar cos rapaces para que entendan a lectura como unha experiencia máxica e chea de ilusión na que a variña máxica do humor non pode faltar.
Poesía para nenos e nenas de 3 a 7 anos. A poeta Yolanda Castaño adapta as súas obras ao público infantil.
