Evento: Peza do mes: Lucerna. Campamento Aquae Querquennae
Peza do mes: Lucerna. Campamento Aquae Querquennae
A presentación pública terá lugar o 11 de setembro ás 20:00 h, na sala de exposicións "Escolma de escultura", con entrada libre.
Como cada mes, o Museo escolle algunha peza de entre os seus fondos (neste caso, dos arqueolóxicos) para ser tratada de xeito pormenorizado e darlle maior visibilidade, afondando no seu contexto e características, datas, filiacións, etc., e reforzar así o seu valor.
Son moitas as pezas que foron recuperadas no contexto arqueolóxico do campamento militar de Aquae Querquennae -Porto Quintela (Bande, Ourense)-. Neste caso, trátase dunha lucerna coas seguintes características: materia e técnica: cerámica moldeada e cocida; datación: 74/75 d. C.–ca. 120 d. C.; dimensións: 5 cm (lonxitude) x 4 cm (diámetro máximo) x 0,7 cm (grosor) x 1,6 cm (altura), Pertence aos fondos do Museo co nº de inventario CE005841/41.
Aínda que en case todas as coleccións dos museos a presenza das lucernas está garantida, moitas delas non ofrecen datacións nin contextos fiables. Non é o caso desta peza, aparecida nun xacemento no cal, dende 1975 e ata hoxe, se realizaron escavacións científicas.
A pesar das múltiples tipoloxías existentes á hora de identificar as lucernas, esta peza encaixa nas denominadas lucernas de canle, unha tipoloxía moi habitual en todo o territorio dominado por Roma, tanto en asentamentos civís como militares, neste último caso, moi distantes entre si.
A lucerna é un utensilio de iluminación no mundo romano, xunto cos fachóns e as candeas, e habituais pola abundancia de arxila e a facilidade da súa manipulación. Constitúen un elemento ideal para reflectir as manifestacións da vida económica e social romana.
É destacable que a marca do artesán aparece na base da lucerna impresa en relevo.
A publicación virtual sobre esta peza está dispoñible neste enlace do Museo Arqueolóxico de Ourense, onde se pode afondar sobre as súas características estilísticas, unha descrición pormenorizada, a reflexión sobre as súas funcionalidades, a autoría ou o contexto arqueolóxico no que se levou a cabo o achado, nun estudio a cargo, neste caso, de Tomás Vega Avelaira.
O autor da fotografía é Fernando del Río Martínez.
Máis eventos de tipo Xornada/Congreso
![](https://www.cultura.gal/sites/default/files/styles/eventos_new/public/images/evento/celme_da_zanfona.jpg?itok=UYHjQeC2)