Evento: Charla do novelista gráfico Rubén Uceda

Cedemos o espazo para celebrar a charla do novelista gráfico Rubén Uceda, labor que leva máis de vinte anos combinando coa de agroforestal. A súa obra fala da desmemoria e a construción dun imaxinario anticapitalista. Estas son as súas obras:

Antes del Futuro, Fantasía y miedo en el capitalismo 2024. Os personaxes deste cómic son cada vez máis conscientes do rumbo ao que se encamiña a nosa sociedade por mor do cambio climático e a dependencia aos combustibles fósiles. Ante todo iso, deciden mirar de fronte ao medo que lles provoca a situación e, sen negalo nin negarse, encárano con reflexións que lles fan sentirse protagonistas do seu tempo, imaxinando e creando formas de vida comunitaria. Ao mesmo tempo relaciónanse cos poderosos, unhas veces con submisión e outras con coraxe.

Casilda Revolucionaria 2022. Novela gráfica sobre a vida de Casilda Hernáez narrado a través da sua propia voz. Casilda foi unha revolucionaria vasca e libertaria, una muller dun lume que non se apaga, unha loitadora que non perdeu a capacidade de soñar. Estas páxinas tráennos boa parte das súas vivencias e sentimentos atravesando unha das épocas máis convulsas e fascinantes do século pasado. Dito coas súas propias palabras: "Naqueles tempos o máis sublime que se podía ser era obreira internacionalista, era algo que se saía do mediocre, un sentimento superior".

Negras tormentas 2022. Esta novela gráfica narra e recrea desde unha perspectiva libertaria o proceso da guerra, a revolución social e a contrarrevolución, a través das inquietudes e vicisitudes dos seus seis protagonistas, militantes anónimos e recoñecidos de CNT e Mujeres Libres. Protagonistas que viven o amor e o odio, as vitorias e as derrotas, así como as contradicións de poñer en práctica os seus ideais. Ao longo das súas páxinas desprégase un alegato contra as guerras nas que o pobo sempre pon os mortos. Á vez que reflicte como unha inmensidade de xentes souberon autoxestionarse sobre a base do apoio mutuo, a solidariedade e o federalismo. É necesario contar estas historias da revolución social, coas súas posibilidades e os seus fracasos, porque son parte esencial dunha memoria colectiva que estivo case sempre cuberta por mantos de esquecemento e prexuízo. Esta volta ao pasado que propón Negras tormentas non é un acto de nostalxia, senón un exercicio de recoñecemento para sabernos na historia, aprender e emocionarnos.

Huerta y el Origen de las Cosas 2020. É a historia dun colectivo que decide poñer en práctica as ideas da agroecoloxía e a autoxestión. O autor traballou como agricultor nun colectivo similar durante anos; baseándose nas súas propias vivencias e en numerosas charlas e entrevistas con outros agricultores e consumidores recrea accións, debates, sucesos e atmosferas que caracterizan a este movemento, con profundidade, amor e humor. Tamén conta a historia da intensa loita dos veciños dun pobo, onde o colectivo ten a súa horta, por evitar que a especulación inmobiliaria destrúa as súas leiras. A horta e a orixe das cousas é unha fábula sobre o que somos, o que fomos e o que poderiamos ser. Unha mirada ao campo como un espazo en loita por un mañá diferente, ecolóxico, respectuoso e en harmonía co medio ambiente.

V de versoñeta 2015. Este cómic contén dúas formas de nomear e interpretar a realidade e os sentimentos que nos xera. Dúas formas de debuxar o mundo que nos rodea, o sórdido e grotesco capitalismo, mais tamén a beleza das pequenas cousas. Os textos proceden da poética de Jorge Reichmann, cuxa voz interior observa, pregunta, imaxina e soña, e as viñetas de Rubén Uceda insúflanlle unha nova vida.

Un libro que recolle reflexións fermosas e proxecta pensamento crítico.V de Versoñeta é un libro de cómic coa estrutura de tiras autoconclusivas. A inspiración gráfica inicial está na serie Macanudo de Liniers. Os textos están referenciados nos versos do poemario de Jorge Riechmann, en concreto dos 6 libros de poemas: Conversaciones entre alquimistas (2007), Rengo Wrongo (2008), Futuralgia (poesía reunida 1979-2000) (2011), Poemas lisiados (2012), Grafitis para neandertales (2019) e Mudanza del isonauta (2020). Versos e recreacións gráficas en formato de historietas que nos falan dos afectos, sexualidade, ecoloxía política, economía, movementos sociais, pensamento ecolóxico, anticapitalismo, memoria histórica, etc. A entrada é libre ata completar a capacidade da sala.