Cultura no Camiño

Esta peza de Teatro Ghazafelhos parodia as películas de aventuras en África producidas en Hollywood na década dos 50. Quatermain, un cazador contratado por un magnate estadounidense debe atopar as lendarias minas do rei Salomón e para iso emprende unha viaxe na que non faltarán os avións de hélices, as loitas con feras e o encontro co mismísimo Tarzán. Unha divertida proposta chea de sorpresas que convida ao público a reflexionar sobre a preservación do medio e a vida.

Compositor, contrabaixista, director musical e produtor, Pablo Sanmamed sempre tivo moitas funcións mais, no corazón, de todo o que fai é ante todo un artista e un gran músico.

Imos cantar, bailar e xogar esas lindas cancións que con tanto agarimo deixou Dorothé Schubarth escritas nos seus libros.

O magomobil é un vehiculo de trece metros de longo por 6 de ancho (teatro sobre rodas)  totalmente autónomo con escenario, cadeiras, luces, son, aire acondicionado, grupo electróxeno etc... que lle permite a o público que  está  no seu interior ver o espectáculo en condicións optimas.

O grupo AFECTO Y DESDÉN, formado pola soprano lírico- lixeira Gemma Román, Vitor Blanco acompañando ca arpa e a guitarra barroca, Uxía Delgado ca tiorba e a guitarra barroca e Pablo Ruibal coas violas da gamba, presentan neste programa e de forma didáctica, unha escolma de cancións e danzas populares na escea Barroca do século XVII en España e Italia.

Un carromato, dous músicos ambulantes e os máis diversos monicreques danzantes. Os Monifates é un proxecto lúdico-­didáctico estreitamente relacionado coa cultura galega, que pretende mostrar a rica e variada música e instrumentación que se conserva en Galicia, unido á recuperación dos chamados monicreques danzantes, hoxe case en desuso, integrando así baile, música e marionetas nun formato distinto e orixinal. 

En Chulísima Aldao e Lado volven empregar a retranca, o humor, a poesía e a música para achegar a quen desexe atreverse a nosa lingua. Durante o espectáculo contamos a historia do galego como nunca cha contaron, moi rápido, moi claro e con bastante sentido do humor. E intentamos desmontar algún dos prexuízos que algunhas persoas usan como escusa para non dicir as súas primeiras frases en galego. Non é unha palestra sobre a historia da lingua, nin unha análise científica sobre a súa situación actual. Nin sequera é un espectáculo didáctico. Pero seguro que descobres cousas.

Alana é un grupo que xorde no ano 2023 co obxectivo de poñer en valor a música tradicional galega. O proxecto trata de mesturar a música tradicional con ritmos contemporáneos de base electrónica e pop. 

A súa música parte de recollidas, un traballo feito coa colaboración de moitas mulleres que desinteresadamente axudan a coñecer e preservar a riqueza da música e da tradición. O estilo de Alana vén moi marcado pola importante presenza no directo das percusións tradicionais, asi como melodías que nos invitan en todo momento ao baile. 

Almanaque musical mostra aos pequenos e pequenas o ciclo do ano con fermosas cantigas acompañadas por Pelán. Pelán ensinaranos o día que é, e todo o que abrangue o almanaque, as estacións, a lua, as mareas, o agro, as festas. A arpa de Bea e a voz de Marcelo do Bode completan o elenco facéndonos cantar e bailar sen deixar de aprender.

A Lilicleta é unha auténtica festa rodante a cargo dun gran showman como é o Señor Lili.

 Un antigo triciclo dos anos 60 de reparto de leite transformado nunha disco a pedais fará que nenos e maiores bailen e desfruten.

Equipo de son autónomo, luces, pompas de xabón, speaker, unha bocina de barco e decoración ou vestiario que se axustan ó tipo de evento

Unha gran elección para animar pasarrúas ou eventos en recintos pechados, feiras modernistas, festas populares, eventos deportivos, nadal, entroido, dinamización de hostelería e comercio, etc