Esta proposta, concibida para ser desenvolta en contornas naturais que favorezan unha escoita activa dos cantos dos paxaros e homenaxear o clásico Ornithology de Charlie Parker e Benny Harris, convoca a dúas das personalidades galegas máis relevantes nos seus ámbitos: o narrador Quico Cadaval e o saxofonista de jazz Pablo Castaño.
Treides Comigo! é un espectáculo cunha moi boa acollida de prensa e público, ao fío do sétimo disco de Xoán Curiel co mesmo nome. Novo e vello ao mesmo tempo, unha fusión do antigo e do contemporáneo, unha visión orixinal, didáctica e diferente de presentar as cantigas da lírica medieval galego-portuguesa neste século XXI.
Un concerto a partir de cantigas actualizadas de diferentes trobadores da lírica medieval galego-portuguesa (séculos XII aXIV) e dos Camiños de Santiago.
Unha lectura contemporánea das obras medievais fundamentais do noso patrimonio que resulta en sons medievais cun novo rostro.
O público descubrirá curiosidades sobre os autores da época, as diferentes formas das cantigas e a súa memoria inmaterial (lendas e historias que lles dan corpo).
A Mekánika Rolling Band é un grupo de animación de rúa, que conta cun escenario móvil autoamplificado, e que incorpora efectos visuais de lume e pirotecnia a parte dun show enérxico, participativo e dinámico. No formato de escenario o show tamén inclúe efectos de lume e pirotecnia.
Leticia Rey e unha cantautora de Vila de Cruces que sorprende a quen a descobre pola súa calidade vocal. O xurado do Premio Estudios Mans a Artistas galegos emerxentes elexiuna entre múltiples propostas con banda cando se presentou neste formato de guitarra e voz, acompañada por Andrés Rey na guitarra e coros en diversos temas (non son familia).
Espectáculo en galego mais con cancións en galego, portugués, castelán e inglés. Unha artista chamada a ser coñecida en calquera lugar do mundo.
Chuches Amil presenta un espectáculo no que cada canción é un soño e cada soño é unha canción, do dereito ou do revés. Todos os membros da familia están convidados a disfrutar de diferentes xeitos de abordar o mundo dos soños e dos contos nun percorrido pola música máis actual feita en Galicia para gozar en familia
Un setlist cheo de éxitos dos albumes Un conto ao revés (2015) e Monstros, con ou sen consentimento (2018), de Chuches Amil.
Louband é unha formación musical nacida en Sarria no ano 2017.
Consta de 7 músicos máis técnico de son e luz. guitarra, baixo eléctrico, teclado, batería e tres ventos (saxofón alto, tenor e trombón). Ademáis, contamos cun remolque-escenario autosuficiente que fai posible o noso espectáculo no exterior, no caso de ser necesario.
Ou Dallecopé de Pulpiño Viascón é un concerto dun home orquestra, único é diferente cun set de percusión nunca visto ata agora en Galicia, ou Farmer Foot Drums, un sistema de tambores e pratos que se activan tocando co pé cun ritmo frenético e ou acordeón (Trikitixa) de Pulpiño Viascón. Non deixarás de mover vos pés co Dallecopé!
“De cando os animais cantaban” . Un traballo cheo de sentimento, rítmo e cor que amosa sen complexos a vitalidade e a contemporaneidade da nosa música de raíz. Toda unha reivindicación da música como necesidade vital do ser. Os doce temas que o compoñen son unha aposta por amosar a potencialidade de boa parte das mesturas tímbricas existentes na nosa tradición viaxando dende as melodías de gaita, clarinete e acordeón ata as inmensas posibilidades das percusións tradicionais e das nosas voces, tanto monódicas como polifónicas. Todo isto resulta nun directo potente, fresco e variado.
Catuxa Salom é unha artista galega de raíces arxentinas e unha das voces máis destacadas do movemento folk-electrónico do momento. En 2022 publica o seu disco revelación Nunha aldea, un EP de debut producido por Marcos Bayón en Prasat Bayon Studio, que reflicte en cada canción un universo sonoro que vai da música tradicional galega aos ritmos latinos. Un disco envolto por unha atmosfera tribal que convida ao baile e nos conecta co noso lado máis puro e salvaxe. De Aimogasta ás montañas de Lugo, Catuxa Salom crea un lugar onde o fogar e o amor pola natureza están moi presentes.
