Ju Young e Martín Otero coñécense nos Países Baixos estudando jazz no Conservatorium van Amsterdam. Ambos comezan a actuar xuntos en diversas agrupacións ata que posteriormente forman un dúo co que seguirán actuando en cidades como Ámsterdam e Leiden. Nesta formación exploran as posibilidades dun repertorio jazzístico cun enfoque máis intimista e persoal, dando espazo a outros estilos musicais e, por suposto, a composicións orixinais.
Clarence Bekker ten o don de tocar a alma de quen lle escoita. Mediante a súa voz profunda, vibrante e un espírito cargado de enerxía, cativa transversalmente a calquera audiencia de xeito total. Ninguén pode manterse impasible ante o seu magnetismo. A forza de grandes mestres do soul, funk e pop como James Brown, Prince, Whitney Houston, Michael Jackson ou Tina Turner están concentrados na súa figura.
O outorgamento do Letter One Rising Stars Jazz Award (Londres, 2020) suscitou interese internacional por unha traxectoria que medrou gradualmente ata volverse movemento imparable. Eloxiada pola crítica sueca e danesa con entusiasmo reservado ós acontecementos inusuais, a súa sona como compositora, arranxista e directora de grandes formacións está chamada a propagarse e conquistar continentes enteiros nos próximos anos. A principios do 2014 en Copenhague, creou a Kathrine Windfeld Big Band, que integran quince músicos escandinavos xoves e brillantes.
Tras Finally in my hands (Ambar Records, 2016) e Fresh start (autoedición, 2018), La revolución (Blue Asteroid Records, 2021) é o novo traballo discográfico de Javier Navas Quintet no que o grupo liderado por Navas segue a perfeccionar unha lingua propia, unha voz auténtica, dentro do jazz nacional.
No cincuenta aniversario da morte de Lee Morgan, trompetista esencial na historia do jazz, nace a idea de renderlle homenaxe interpretando as súas composicións e recreando o seu propio son da época dourada do hard bop.
Tras superar unha etapa terrible de saúde, o Howlin' Wolf estremeño que burlou a morte, Gene García, un dos poucos referentes vocais masculinos do jazz peninsular, volve co seu marcado estilo crooner e forzas renovadas para editar GeneSis, soberbio traballo arroupado por magníficos músicos lisboetas no cal converxen de maneira culminante jazz, blues e soul.
Henri Texier é todo un ídolo do jazz francés das últimas cinco décadas. A súa carreira é unha das máis emblemáticas e ricas dos músicos de jazz europeos. Símbolo dunha xeración desinhibida e ávida de experimentación, o contrabaixista e compositor foi o catalizador inesgotable de multitude de aventuras musicais, desempeñando un papel decisivo nas mesmas pola súa capacidade para unir enerxías creativas e anima-las novas xeracións de músicos europeos.
Presentación do disco All The Gods, cuxas composicións, a excepción de unha, resultan da inventiva dos seus autores (temas compostos por Valentín Caamaño e Alfonso Calvo —un—). «Caamaño es un músico versátil, con una forma de tocar llena de color y swing… un músico de otra época, un Pat Martino actual que recuerda a Tal Farlow en algunos momentos» (Félix Amador Gálvez, Jazz, Ese Ruido, 2015).
Billy Cobham é un dos baterías que máis influíu na forma de tocar este instrumento desde os anos setenta. Enriqueceu a técnica da batería jazz, trasladouna con enerxía ó campo do jazz rock e transformouse nun modelo para moitos baterías de ambos xéneros. No 1969 Cobham foi cofundador do combo de jazz rock Dreams, que incluía a Randy Brecker, Michael Brecker, Horace Silver, George Benson, John Abercrombie, Don Grolnick e Will Lee.
Desde a perspectiva da artista nomeada para os Grammy Cyrille Aimée a improvisación non é só unha técnica vocal, é un xeito de vida que lle permite compartir co mundo a súa contaxiosa voz e a súa chispa creativa e que a levou, ademais, a tomar novos rumbos.
