Nas actuacións de Tiruleque están presentes instrumentos unidos á música tradicional galega, mais empregados ao seu xeito. Reinterpretando en certa maneira a tradición, Tiruleque recorre á súa intuición musical á hora de arranxar melodías tradicionais e bota man da riqueza de instrumentos que esta música nos ofrece, pero dando un paso mais aló no uso das tonalidades e modos.
Fado Violado, proxecto que mestura dous estilos aparentemente distantes, como son o fado e o flamenco, presenta no Vello Cárcere de Lugo o seu último disco, A jangada de pedra.
Ana Pinhal é a voz e Francisco Almeida a guitarra.
Oscar Ibáñez presenta o seu primeiro traballo discográfico en solitario baixo o título “Alén do mar” (VIR, 2012). Neste disco o gaiteiro e frautista pontevedrés invítanos a unha viaxe sonora que discorre polo Atlántico chea de orixinalidade, imaxinación e creatividade, a través dunha magnífica selección de melodías galegas e latinoamericanas enriquecidas con elementos propios da música celta.
Korrontzi é un grupo de música tradicional vasco formado en 2004 por Agus Barandiarán, trikitilari da banda (o trikitixa é un acordeón diatónico vasco). O seu propósito era dar aos sons tradicionais da música folk do País Vasco un aspecto contemporáneo, acompañado doutros instrumentos máis modernos como guitarra, baixo, contrabaixo eléctrico e percusións.
A banda leva seis álbums publicados ao longo dos seus doce anos nos escenarios. Durante eses anos viaxaron coa súa música por todo o mundo, visitando diferentes países e festivais.
Despois dun longo silencio trala publicación de "Entre dous mares", Rosa retorna con "Nada que perder”.
Nel experimenta cos lindes da world music sen clixés nin estereotipos que a deteñan, logrando un disco cheo de luz onde as súas propias composicións son a mellor mostra da atmósfera persoalísima que só Rosa pode chegar a crear.
Gelria presenta na Coruña, a súa cidade natal, o seu primeiro disco, Cantos de poeta. O trío galego-catalán, formado por Mario G. Cortizo, Federico Mosquera e Elena Tarrats, fai un percorrido musical pola mellor poesía galega de todos os tempos. Cantos de poeta, publicado en 2016, inclúe textos de Manuel Rivas e Xosé Lois Romero e musica poemas desde Rosalía de Castro ata Chus Pato pasando por Manuel Antonio, Novoneyra ou Cunqueiro.
Cé Orquestra Pantasma dinamiza cos seus xogos e coa súa música esta xornada no dolmen de Dombate, en Cabana de Bergantiños.
Baixo Cé Orquestra Pantasma agóchase o vigués César Freiria, músico autodidacta e apaixonado dos instrumentos musicais. Comezou a súa andaina musical aos oito anos dentro da música tradicional e dende aquela non deixou de navegar polos variados estilos da música popular, chegando a formar parte de grupos tan dispares entre si coma A Roda ou a banda de punk Oxtiax ke te Pariu.
O Auditorio Neira Vilas da Cidade da Cultura acolle un acto homenaxe á figura de Germán Lago, fundador e director de diferentes agrupacións musicais de pulso e púa, e que presentou en Madrid en 1929 a Orquesta Ibérica, formación de bandurrias, laúdes e guitarras que contou dende os seus comezos coa favorable atención dos críticos e compositores da Xeración do 27 e numerosos contratos discográficos.
Coanhadeira condensou nunha caixiña todas as pequenas e grandes ideas xurdidas ao longo dos últimos cinco anos. Bicos con luvas pretende sumarse en positivo á musica feita en Galicia, sen prexuízos e facer bailable calquera lugar, ateigar do poder percusivo, de letras sorprendentes, de atmosferas sutís, de adornos do país e de anacos dos mundos de cada un dos compoñentes da formación e do camiño conxunto até hoxe de Coanhadeira. Por eses camiños, este grupo folk continuará unha traxectoria musical que xa recolleu o recoñecemento do público e da crítica.
O folk tradicional mesturado con outras formas de expresión artística de Habelas Hainas chega ao bar de Moaña.
Entrada 5 euros. Pode reservarse no 986 31 09 91.
